Пустыня пожналö самум,
И степын сынöд кöрыс кургов.
Кöн туй помыд, Каракорум,
Зарни Ордалöн вöвлöм юркар?
Öд тасянь петавлiс Орда
Да грöзсö быдладорö нуис,
Из каръяс кисьтiс - кольлiс дав,
Тадз пöлöнитiс озыр муяс.
Тэ вöлiн кöртöн дорöм куд,
Эз имит би, эн сетчыв венны.
Но öшалiс нин сьöкыд пуд,
И лоин вывтi дженьыд нэма.
А Русьын сэтшöм кар эз вöв,
Ордаöн вöрзьöдтöм мед коли.
Москватö весиг кымын пöв
И сотлiсны, и куслi олöм.
Веж пöим вылын ловзис бöр,
Кöть сёысь пöдлi аслас вирöн,
И кыпöдчисны Енмыс сьöр
Сöдз юра крамъяс енэж йирö.
...Зэв ылöдз нулiс гажтöм дум.
Степ шöрын чизыр тöв со мургö:
Кöн туй помыд, Каракорум,
Зарни Ордалöн вöвлöм юркар?
Кад муртас улысь нем он дзеб,
Сы киын став — му вылас вöлысь.
Чав лыа. Мылькъяс. Тыртöм степ.
Да буса туй весьтын виж тöлысь.
