* * *
Тӱнясе кышкарым ончалын,
Ойган пӱрымашым вурсет.
Чонем шуматкечын – мончалык,
Шем шикш монча валне вужген.
Мый таче шкетак лапкавалне
Шинчем, шокшо южеш ырен.
Куэ выньыкем капем валне
Модеш ю куатым тӱрген.
Шокшештын, поктем кап-кылем гыч
Чер мужым, осал кылмымем.
Ужар лышташан выньыкем гын
Туге поньыжеш могырем!
Мончаште саманын куанже,
Вашкем шокшо парым лукташ.
Монча – тиде илышын райже,
Ойлен Шнуйкочана улмаш.
Кугу йӱк-йӱан деч умбалне
Монча йӱлалан йывыртен,
Изи юмыла мландывалне
Илем, илышем йӧратен.
